Paulit-ulit at pabalik-balik na tinatahak ang landas na sa pakawari nati’y maghahatid ng ligalig sa ating buhay. Madalas tayong mapalingon sa iba’t ibang direksyon. Tama nga ba? Ang binabaybay ng ating mga paa?ang tinutungong direksyon ng ating mga mata?
Di mabilang sa ating mga daliri kung ilang ulit tayong nawala, kung ilang beses tayong bumalik at muling nagsimula. Isip ay ginugulo ng walang kasiguraduhang desisyon at ng walang katapusang “sana”.
Naghahanap tayo ng kapayapaan sa kaisipan at lugar na maghahatid sa atin ng kakaibang realisasyon.
Ooops di ka nag-iisa! Kaya naman halika na at bisitahin ang Shane Beach Resort kung saan, “ Kapayapaan at Kasiyahan sagot ko! Let it Shine, let it shine, let it be Shane Beach Resort”.
Muling tuklasin ang bagong usbong sa Brgy. Tiblong San Fabian, Pangasinan – Shane Beach Resort. Kung saan sasalubungin ka ng yakap mula sa preskong hangin na nagmumula sa dagat kasabay ng pagaspas ng mga puno at huni ng mga ibon. Nariyan din ang nakabibinging katahimikan na nararapat lamang sa magulong isipan at tanawin na nagpapakalma ng emosyong nag-aalab sa kalungkutan.
Upang makarating ay kinakailangang sumakay ng bus sa halagang P20 lamang na magmumula sa siyudad ng Dagupan patungo sa bayan ng San Fabian. Madali itong makita sapagkat ilang metro lamang ang agwat nito sa kalsada.
Bago pa lamang ang beach resort kung kaya’t hindi pa ito kilala ng mga karatig lugar. Umaabot sa P150 ang bayad ng isang tao at may bawas na P30 para sa mga bata.
Tinataglay nito ang dalawang swimming pool, mga cottages, banyo, lugar na maaaring pagdausan ng kaarawan, kasal, binyag at iba pa.
Maaari ring magsalo-salo ang pamilya rito kasabay ng pag-iihaw ng barbeque o pagluluto ng mga ulam. Sabayan na rin ng kantahan sapagkat sa halagang P100 ay isang oras niyo na kayong magja-jamming. Kung mayroong dalang sasakyan ay maaari mo rin itong linisan sa halagang P50 at P150 naman kung papalinisan sa iba.
Isa pang magandang katangian nito ay hitik sa mga puno at halaman ang paligid. Magandang kumuha ng mga larawan at hindi mo na kakailanganin ang load para iupload ito dahil may free wifi rin sila. Bongga diba!
Kung nanaisin ang mas malawak na espasyo o languyan ay maaaring magtungo sa tabing-dagat. Kung nabitin at nais magpagabi, may mga marerentahang kwarto na swak lamang sa bulsa.
Hindi man ito kasing gara o kasing lawak ng iba pang resort ay napag-pagaanan na namin ang lugar sapagkat maayos ang pamamalakad at pakikitao ng may-ari nito. Tunay mo ring mahahanap ang katahimikan at mananamnam ang ganda ng kapaligiran na tila yumayakap at umaawit sayo. Hanggang sa muling paglalakbay mga ka-voyage!
Voyagers 