Ang hakbang ng iyong mga paa ang magtatatag sa iyong kaalaman.
Sabado ng umaga, huling araw ng Nobyembre ay dinala kami ng aming desisyon sa bayan ng San Fabian. Bus ang naging transportasyon upang makarating sa aming pupuntahan. Habang binabaybay ang daan ay pawang mga kasiyahan lamang ang aming pinag-uusapan patungkol sa aming lugar na dadayuhan. Dahil na rin sa magagandang komento na aming nakita sa social media ay na-engganyo kami na silipin ito. Mula sa siyudad ng Dagupan ay bente pesos ang singil papuntang Brgy.Mabilao San Fabian. Mahaba-haba ang aming nilakbay. Ibinaba kami sa kanto ng Brgy. Mabilao kung saan masisilayan na agad ang karatula ng lugar na aming sadya. Motorsiklo naman ang kailangan sakyan papasok sa halagang 60 pesos na paghahatian ng apat na tao. Liblib at pawang mga puno ng kawayan ang makikita sa daan ng aming paroroonan.
Malawak na bukirin na may imprastraktura ang sumalubong sa aming mga mata, sa lugar na tinatawag na Farmville.
Bago mapasok ang balwarte ng lugar ay madadaanan ang isang maliit at sementadong tulay na sinundan ng pababang lupa patungo sa entrada ng Farmville. Sa kanang bahagi ay mayroong malaking tablang kahoy na nakasulat ang pagkakakilanlan ng lugar, at sa bandang kaliwa ay maliit na kamalig kung saan isinasagawa ang pagbabayad ng 100 pesos para sa entrance fee. Sa pagitan ng dalawa ay pilapil patungo sa luntiang bukirin na nilakapan ng sining. Kapansin-pansin sa lugar ang bagong tanim na mga palay. Sa pagpapatuloy sa pagtahak sa mga pilapil ay makikita ang isang nakaupong alay-ay, mga poste ng ilaw, mga bata, pamilya, magkasintahan at magkakaibigan na dumayo sa lugar. Makikita rin ang wishing well na gawa sa mababaw na balon.
Ang pinaka-patok sa lugar ay tinawag na The Hobbit House, ito ay mistulang bahay sa ilalim ng burol, ang pinto ay hugis bilog at ang paligid ay hitik sa mga halaman at bulaklak. Sa unang bahay ay maaaring ipahinga at bumili ng milktea o nachos, at kung gugustuhing umakyat sa tuktok ng bahay ay may daan na inilaan, sasalubungin ka ng mga ligaw na damo at talahib. Sa harap ng unang bahay ay mga pugad ng kalapati na inihawig sa The Hobbit House. At sa dulo ng mga pugad ay isang dilaw na pinto ang nakatayo at paboritong kunan ng larawan ng mga dumadayo. Ang dalawang bahay na may magkaibang direksyon ay inuupahan ng kung sino mang gugustuhing manatili sa lugar. Maayos at moderno ang disenyo ang loob ng bahay samantalang makulay at kaakit-akit naman ito sa labas. Hindi rin kumawala sa aming mga mata ang malaking Kawa Bath, may laman itong tubig at mga bulaklak at sa ilalim ng kawa ay mga troso. Magmimistula kang niluluto kung ikaw ay umupo sa kawa.
Talaga nga namang sinusulit ng mga dumadayo roon ang pagkuha ng mga larawan. Maaliwalas at tahimik na may kasamang mga halinghing at tawanan ang maririnig sa paligid. Sino nga bang mag-aakala na sa gitna ng kawalan ay isang sining ang nabubuo, sa gitna ng luntian ay may mga kulay na inihahalo.
Gayunpaman, sa ganda nito ay masasabing hindi pa buo ang lugar. Ngunit tiwala na mas uusbong pa ang nabuhay na sining sa luntiang bukirin.
Voyagers 